Գալիս եմ եզրահանգման, որ Կտրիճ Ներսիսյանի և բարձրաստիճան հոգևորականների պրոբլեմն իրական Հայաստանի հետ է, որովհետև իրական Հայաստանը հնարավոր չէ թաքցնել սքեմի տակ, որովհետև այն, ինչ թաքցվել է սքեմի տակ, իրական Հայաստանում ստիպված ես լինելու այդ սքեմը մի կողմ քաշես, որպեսզի պարզվի՝ տակն ինչ կա: Այդ մասին Ազգային ժողովի՝ հունիսի 19-ի նիստին հայտարարեց «Քաղաքացիական պայմանագիր» խմբակցության ղեկավար Հայկ Կոնջոյանը:
«Թիրախավորում են իրական Հայաստանը, թիրախավորում են սահմանազատված սահմանը, թիրախավորում են հարկը և Ակադեմիական քաղաքը, թիրախավորում են ամեն ինչ, որտեղ կա թափանցիկություն, կոնկրետություն, հաշվետվողականություն, լուսավորություն, առաջադիմություն, որովհետև հնարավոր չէ այդ ամեն ինչը թաքցնել խավարի մեջ, սքեմի տակ, որովհետև բարեգործությունը կարող է չկարողանաս հարկել, չկարողանաս հայտարարագրել, բայց իրական Հայաստանում հարկը պետք է թափանցիկ լինի, հարկը պետք է մուծել պետությանը. սրա մասին է ամբողջ պրոբլեմը:
Ահա, թե ինչու են Մայր Աթոռի բարձրաստիճան հոգևոր պետերը՝ օլիգարխիայի հետ դաշինք կնքած, հարձակվել ՀՀ լեգիտիմ իշխանության և ժողովրդավարության վրա»,- ասաց նա: