Վրաստանում խորհրդարանական ընտրություններին ընդառաջ երկրի վարչապետ Իրակլի Կոբախիձեն ներկայացրել է իշխող «Վրացական երազանքի» նախընտրական ծրագիրը, որը ներառում է հարաբերությունների կարգավորում ԱՄՆ-ի, Եվրամիության և Ռուսաստանի հետ:
«Պրագմատիկ քաղաքականությունը և Ռուսաստանի հետ հակամարտության խաղաղ կարգավորումը կարևորագույն առաջնահերթություններից են»,- հայտարարել է Կոբախիձեն:
Խոսելով առաջիկա չորս տարվա համար սահմանված արտաքին քաղաքական ծրագրերի մասին՝ Կոբախիձեն պետական կարևորագույն հարց է որակել ԱՄՆ-ի և Եվրամիության հետ հարաբերություններին նոր թափ հաղորդելը:
Վրաստանի վարչապետը որպես առաջնային խնդիր նշել է նաև ՆԱՏՕ-ի հետ հարաբերությունների խորացումը և Չինաստանի հետ ռազմավարական գործընկերությունը, ինչպես նաև՝ հարևան Հայաստանի, Ադրբեջանի և Թուրքիայի հետ հարաբերությունների խորացումը։
Վրաստանում խորհրդարանի ընտրությունը տեղի կունենա հոկտեմբերի 26-ին: