Անվտանգության խորհրդի նիստից առաջ վարչապետը արտաքին գործերի նախարարին հայտնել է առաջարկության բովանդակության մասին, որի հետ կապված նախարարի կողմից առնվազն առարկություն չի հնչել, մնացյալ դրդապատճառների մասին չգիտեմ՝ խորհրդարանական ճեպազրույցների ժամանակ նշեց «Իմ քայլը» խմբակցության ղեկավար Լիլիթ Մակունցը՝ անդրադառնալով Արա Այվազյանի հրաժարականին:
Նա ասաց, որ վարչապետի պաշտոնակատարի առաջարկությանն արձագանքել են ԵԱՀԿ Մինսկի խմբի համանախագահությունը, ԱՄՆ-ն, Կանադան, Լիտվան և մի շարք այլ երկրներ:
«Մենք կարող ենք այս պահին արձանագրել, որ հանրային արձագանք առնվազն ԵԱՀԿ Մինսկի խմբի համանախագահների կողմից եղել է, ընդ որում՝ բոլոր համանախագահների մասնակցությամբ»,- նշեց Մակունցը՝ հավելելով, որ հիմա արդեն պետք է սպասել գործնական քայլերի հենց ադրբեջանական զինված ուժերի կողմից:
Արձագանքելով Ալիևի հայտարարությանը՝ Մակունցը նշեց, որ ինքը հակված է մեջբերելու Հայաստանի Հանրապետության վարչապետի խոսքը և ոչ թե Ադրբեջանի նախագահի:
«Վարչապետը նշել է, որ խոսքը բացառապես ենթակառուցվածքների ապաշրջափակման մասին է և ոչ թե միջանցքի»,- ընդգծեց «Իմ քայլը» խմբակցության ղեկավարը: