Հունիսի 21-ին խոշոր ավտովթար է տեղի ունեցել Լոռու մարզում:
«Հայկական ժամանակ»-ի տեղեկություններով՝ Վանաձոր-Դիլիջան ավտոճանապարհին՝ Ֆիոլետովո գյուղի վարչական տարածքում, «Մերսեդես» մակնիշի ավտոմեքենան դուրս է եկել երթևեկելի գոտուց և հայտնվել ձորում:
Վթարի հետևանքով մահացել են վարորդն ու մեքենայի 3 ուղևորը:
Մարմինները հայտնաբերվել են մեքենայից դուրս՝ տարբեր հատվածներում:
Վանաձորի բժշկական կենտրոնից փոխանցել են, որ ահազանգը ստանալուն պես դեպքի վայր են մեկնել շտապ օգնության հերթապահ խմբերը, որոնք տեղում արձանագրել են 4 մահ:
Դեպքի վայրում շարունակում են աշխատել ոստիկանության, փրկարարների և շտապօգնության խմբերը: