Իրանում եռօրյա ազգային սուգ է հայտարարվել երկրում օրեր շարունակ տեղի ունեցող ցույցերի և անկարգությունների ժամանակ զոհվածների հիշատակին։ Երկրի կառավարության հայտարարության մեջ ասվում է, որ սուգը «Միացյալ Նահանգների և Իսրայելի դեմ իրանական ազգային պայքարում» զոհվածների հիշատակի համար է։
Իրանից պաշոնական տեղեկատվությամբ ցույցերի ընթացքում 38 իրանցի իրավապահ է զոհվել. ցուցարարների զոհվելու մասին պաշտոնական տվյալներ չկան: Արևմտյան լրատվամիջոցներից AP-ն, հղում անելով ակտիվիստներին, հայտնում է, որ ցույցերի հետևանքով զոհվել է առնվազն 544 մարդ։
ԱՄՆ նախագահ Դոնալդ Թրամփը hունվարի 11-ին Air Force One ինքնաթիռում լրագրողներին ասել է. «Իրանի առաջնորդները զանգահարել են… Հանդիպում է նշանակվում… Նրանք ցանկանում են բանակցել»։
Այս ամենին զուգահեռ Դոնալդ Թրամփը հայտարարել է, որ ԱՄՆ-ն դիտարկում է Իրանում ռազմական գործողություններ իրականացնելու հնարավորությունը՝ նշելով, որ Իրանը սկսում է անցնել իր սահմանած կարմիր գիծը՝ երկրով մեկ բողոքի ցույցերի նկատմամբ ուժի կիրառման սաստկացման պայմաններում։