Իրանի Իսլամական Հանրապետության նախագահ Իրանի նախագահ Մասուդ Փեզեշքիանը կոշտ արձագանք է տվել Իսրայելի՝ Իրանի տարածքի նկատմամբ իրականացրած հարձակմանը՝ հայտարարելով, որ Իրանը չի լռի և հզոր ու օրինական պատասխանով կստիպի զղջալ իր արարքի համար։
Ինչպես տեղեկացնում է «Արմենպրես»-ը, վկայակոչելով Fars-ը, Փեզեշքիանը նշել է, որ ուրբաթ լույս գիշերը տեղի ունեցած հարձակումը, որի հետևանքով զոհվել են մի խումբ զինվորական հրամանատարներ, գիտնականներ և քաղաքացիական անձինք, ոչ միայն խախտում է միջազգային բոլոր պարտավորությունները, այլև «նորից ապացուցում է Իսրայելի հանցագործ բնույթը»։
Իրանի նախագահը շեշտել է, որ Իրանի Իսլամական Հանրապետությունը մշտապես ցուցաբերել է պատրաստակամություն՝ նպաստելու տարածաշրջանային և համաշխարհային խաղաղությանը, և այժմ վճռականորեն կգործի՝ ի պատասխան ագրեսիայի և ի պաշտպանություն երկրի ինքնիշխանության: