Օմանի ԱԳ նախարար Բադր Ալբուսաիդին և նրա իրանցի գործընկեր Աբբաս Արաղչին քննարկել են փուլային սխեման, որը կարող է գործնական և իրագործելի հիմք դառնալ խնդրի կարգավորման համար, ասված է համատեղ հայտարարության մեջ: Ծրագիրը նախատեսում է նեղուցով նավագնացության համատեղ ժամանակավոր միջանցքի ստեղծում և ջրային տարածքի ականազերծում։ Հետագա բանակցությունները կորոշեն նեղուցի նավագնացության մշտական միջանցքը և ապագա կառավարման ռեժիմը:
Իրանի փոխարտգործնախարար Քազեմ Ղարիբաբադին պետական հեռուստատեսությանը տված հարցազրույցում նշել է, որ Օմանի ծոցից Պարսից ծոց մտնող ծովային ժամանակավոր երթուղին ամբողջությամբ կանցնի Իրանի տարածքային ջրերով, իսկ ելքը կլինի՝ ինչպես Իրանի, այնպես էլ Օմանի ջրերով։ Ղարիբաբադիի խոսքով՝ Իրանը և Օմանը մտադիր են շարունակել բանակցությունները առաջիկա 30-60 օրվա ընթացքում։
Իրանի և Օմանի բանակցություններին նախորդել էր ԱՄՆ նախագահ Դոնալդ Թրամփի սպառնալիքը՝ հարված հասցնել Սուլթանությանը, եթե վերջինս «խոչընդոտի» Վաշինգտոնի և Թեհրանի միջև Հորմուզի շուրջ բանակցությունները: