Իսպանիայի հյուսիսում և Ֆրանսիայի հարավում բռնկվել են անտառային խոշոր հրդեհներ։ Կրակը հասել է Ֆրանսիայի երկրորդ ամենամեծ քաղաքի՝ Մարսելի ծայրամաս, ինչի պատճառով հուլիսի 8-ին քաղաքի օդանավակայանը փակվել է: 800 հրշեջի և հրշեջ ինքնաթիռների մասնակցությամբ գործողության շնորհիվ հրդեհը վերահսկողության տակ է վերցվել, հայտարարել է Ֆրանսիայի ներքին գործերի նախարար Բրունո Ռետայոն:
Նախնական տվյալներով՝ Մարսելում զոհեր չկան, 110 մարդ թեթև վնասվածք է ստացել, այդ թվում՝ 30 հրշեջ ու ոստիկան։ Հրդեհը տարածվել է 700 հեկտար տարածքի վրա և վնասել 63 բնակելի շենք, որոնցից 10-ը ամբողջությամբ այրվել են, 400 մարդ տարհանվել է։
Անտառային հրդեհների պատճառով Իսպանիայի մեծ մասը բարձր պատրաստվածության վիճակում է։ Օդերևութաբանական դիտարկումների սկզբից ի վեր երկրում գրանցվել է ամենատաք հունիսը։ Իրավիճակը հատկապես լուրջ է Կատալոնիայի շրջանում, որտեղ անտառային հրդեհները ոչնչացրել են 3 հազար հեկտար տարածքի բուսականությունը։ Հրդեհի մարմանը մասնակցել են ավելի քան 300 հրշեջ ու զինվորական, սակայն ուժեղ քամին դժվարացրել է գործողությունը: