Անկարան Փարիզին մեղադրել է Թուրքիայում իրականացվող դատական գործընթացներին միջամտելու փորձի համար:
Թուրքիայի արտգործնախարարությունն արձագանքել է Ֆրանսիայի արտգործնախարարության մտահոգությանը մի շարք թուրք ընդդիմադիր գործիչների, այդ թվում՝ Ադանայի, Անթալիայի, Ադըյամանի քաղաքապետների ձերբակալությունների առնչությամբ: Ֆրանսիայի արտաքին քաղաքական գերատեսչությունից թուրքական իշխանություններին կոչ էին արել հարգել սեփական քաղաքացիների ու ընդդիմադիր պատգամավորների իրավունքները՝ ապահովելով արդար դատավարության ու խոսքի ազատության իրավունքի իրացումը։
«Մենք մերժում ենք Ֆրանսիայի Եվրոպայի և արտաքին գործերի նախարարության հայտարարությունը, որն իր բնույթով մեր երկրի ներսում դատական գործընթացներին միջամտություն է։ Թուրքիան ապահովում է իր բոլոր քաղաքացիների արդար ու անաչառ դատավարության իրավունքը՝ օրենքի գերակայության սկզբունքին համապատասխան»,- ասված է հայտարարության մեջ:
Թուրքական կողմը խորհուրդ է տվել Ֆրանսիային հարգել իրենց ներքին օրենսդրությունը և դատական համակարգի անկախությունը, «խուսափել այլ երկրների հասցեին քաղաքական հայտարարություններից և կենտրոնանալ սեփական ներքին խնդիրների վրա»։