Ուկրաինայի նախագահ Վոլոդիմիր Զելենսկին հայտարարել է երկրում տարածքային պաշտպանության օտարերկրյա լեգեոն ստեղծելու մասին։ Այս մասին հայտնում է ТАСС-ը՝ վկայակոչելով Ukrinform հրատարակությանը։
Ըստ Ukrinform-ի՝ Զելենսկին ասել է, որ բոլոր ցանկացողները կարող են գալ և «կանգնել ուկրաինացիների կողքին»:
Ինչպես նշում է հրատարակությունը, օտարերկրացիներից կձևավորվի առանձին ստորաբաժանում՝ Ուկրաինայի տարածքային պաշտպանության միջազգային լեգեոն։
Զելենսկին նաև հայտարարել է, որ Ուկրաինան պաշտոնապես հայց է ներկայացրել Ռուսաստանի դեմ Արդարադատության միջազգային դատարան։
Ի դեպ, Մեծ Բրիտանիայի արտաքին գործերի նախարար Լիզ Թրասը հայտնել է, որ բրիտանական իշխանություններն աջակցում են Զելենսկու կոչին՝ օտարերկրացիները գան Ուկրաինա և միանան տեղի տարածքային պաշտպանության ստորաբաժանումներին։