Ապրիլին ակնկալվող ԱՄՆ-ԵՄ-Հայաստան եռակողմ հանդիպմանն է անդրադարձել Ադրբեջանի ԱԳՆ խոսնակը: Այխան Հաջիզադեն մեղադրել է Վաշինգտոնին և Բրյուսելին ակնհայտ հայամետ դիրքորոշման համար:
«ԵՄ-ն և ԱՄՆ-ը կկիսեն ապակայունացնող ցանկացած գործողության պատասխանատվությունը»,- հայտարարել է պաշտոնյան։
Հաջիզադեի խոսքով՝ այժմ միջազգային իրավունքի հիմնարար նորմերի և սկզբունքների հիման վրա եզակի հնարավորություն է ստեղծվում՝ հասնելու տևական խաղաղության, կայունության և անվտանգության:
«Կոչ ենք անում բոլոր կողմերին՝ զերծ մնալ քայլերից, որոնք կարող են բացասաբար ազդել խաղաղությանն ուղղված ջանքերի վրա և դառնալ տարածաշրջանում սրացման նոր ալիքների պատճառ»,- նշել է նա:
Հաջիզադեն մտահոգություն է հայտնել Հայաստանում ԵՄ դիտորդների հետ կապված, մեղադրել առաքելությանը հակաադրբեջանական գործունեության համար: ԱԳՆ խոսնակը նաև դժգոհել է, որ Ֆրանսիան և Հունաստանը գործակցում են Հայաստանի հետ պաշտպանության ոլորտում:
«Ադրբեջանը երբեք նման անվերապահ աջակցություն չի ստացել ԵՄ-ից և ԱՄՆ-ից»,- բողոքել է նա: