ԵԱՀԿ նախագահող երկիր Լեհաստանի անունից հայտարարություն է տարածվել Ադրբեջանի վերջին սադրանքների կապակցությամբ: ԵԱՀԿ կայքում հրապարակված հայտարարության մեջ ասված է.
«ԵԱՀԿ-ում Լեհաստանի գործող նախագահությունն իր խոր մտահոգությունն է հայտնում հայ-ադրբեջանական սահմանի երկայնքով բախումների վերսկսման կապակցությամբ, որը նոր զոհերի պատճառ է դարձել:
Մենք կոչ ենք անում զերծ մնալ ուժի կիրառումից և շարունակել վերջերս սկսված իմաստալից քաղաքական երկխոսությունը: Լեհաստանը՝ որպես ԵԱՀԿ-ի նախագահող երկիր, պատրաստակամ է համագործակցել գործընկերների հետ՝ վերականգնելու և ամրապնդելու տարածաշրջանում կայուն զարգացման ու տևական խաղաղության հաստատմանն ուղղված ջանքերը:
Այդ առումով մենք աջակցում ենք ԵԱՀԿ Մինսկի խմբի համանախագահների ջանքերին: Նաև վերահաստատում ենք մեր վճռական աջակցությունը ԵԱՀԿ-ում գործող նախագահի (Լեհաստան) անձնական ներկայացուցիչ, դեսպան Անջեյ Կասպրշիկի շարունակական աշխատանքին»: