Գյումրու «Սուրբ Մարիամ» մանկապարտեզն այսուհետ կգործի նորակառույց ու հարմարավետ շենքային պայմաններում։ Մանկապարտեզի բացմանը ներկա էին տարածքային կառավարման եւ ենթակառուցվածքների նախարարության, մարզային եւ քաղաքային իշխանությունների, ինչպես նաեւ «Տարածքային զարգացման հիմնադրամ»-ի եւ Համաշխարհային բանկի ներկայացուցիչներ: Կրթօջախի բացման օրը եւս պատահական ընտրված չէր. հունիսի 1՝ երեխաների պաշտպանության օրը: Նշենք, որ շինաշխատանքներն իրականացվել են ՀՀ տարածքային կառավարման եւ ենթակառուցվածքների նախարարության, Հայաստանի Տարածքային զարգացման հիմնադրամի «Սոցիալական ներդրումների եւ տեղական զարգացման» ծրագրի շրջանակներում, ֆինանսավորողը Համաշխարհային բանկն է։ Ծրագրի իրականացման համար ներդրվել է մոտ 172 մլն դրամ, որից համայնքի ներդրումը կազմում է մոտ 20 մլն դրամ: