Տասն ամիս շրջափակման մեջ լինելու հետևանքով ունենք շատ խիստ սրված առողջական խնդիրներով հայրենակիցներ, որոնք չեն ունեցել իրենց քրոնիկ հիվանդությունների ընթացքն ապահովելու անհրաժեշտ դեղորայքը, և տեղահանման հետ կապված հավելյալ սթրեսը, սննդի բացակայությունը հաշվի առնելով՝ կարող ենք փաստել, որ բժշկական կենտրոններ դիմելիության աճ ենք ունենալու: Այս մասին Հումանիտար կենտրոնի կողմից ցուցաբերվող աջակցության աշխատանքների ընթացքը ներկայացնելիս ասաց ՀՀ առողջապահության նախարար Անահիտ Ավանեսյանը:
«Բռնի տեղահանված մեր հայրենակիցներն օգտվելու են ՀՀ-ում առկա պետպատվերի ամբողջ ծավալից: Հիվանդանոցային բուժօգնության ամբողջ ծավալը ևս պետական պատվերի շրջանակներում հասանելի է լինելու մեր բռնի տեղահանված հայրենակիցներին»,- հայտնեց նախարարը:
Նրա խոսքով՝ բացի բուժօգնության ծառայություններից, ԼՂ-ից բռնի տեղահանված մեր հայրենակիցները նախարարության թեժ գծի միջոցով կարող են տեղեկատվություն ստանալ, հաշվառվել և հետագայում աշխատանքով ապահովման, կրթական ծրագրերում ներգրավման հնարավորություն ունենալ: