Ավելի հեշտ է կանխարգելել, քան բուժել. սրտանոթային հիվանդությունների հարցերն օրակարգում

Սրտանոթային հիվանդությունների կանխարգելման և բուժման հարցերն առողջապահական առաջնահերթ խնդիրներից են: Ոլորտի մասնագետներին մեկ հարկի տակ է համախմբել սրտանոթային հիվանդությունների, այդ թվում` սրտային անբավարարության հարցերին նվիրված երկօրյա ամենամյա գիտաժողովը: Այդ մասին հայտնում են ՀՀ առողջապահության նախարարությունից:
Անդրադառնալով առավել տարածված ոչ վարակիչ հիվանդություններից մեր երկրում մահացության դեպքերի տարեցտարի աճին` առողջապահության նախարարի տեղակալ Արտակ Ջումայանն ընդգծել է, որ առողջապահության նախարարությունն առաջնորդվում է «ավելի հեշտ է կանխարգելել, քան բուժել» սկզբունքով` ներկայացնելով մի շարք պետական ծրագրեր, որոնք միտված են սրտանոթային հիվանդություններով պայմանավորված բնակչության մահացության նվազեցմանը:
«Սքրինինգային ծրագիր, որի շրջանակներում 35-68 տարեկան բոլոր քաղաքացիները առաջնային օղակում կարող են անվճար հետազոտվել` զարկերակային գերճնշման վաղ հայտնաբերման նպատակով: «Սրտի անհետաձգելի վիրահատություններ» կամ բոլորիս հայտնի Stent for Life՝ կյանք փրկող ծրագիր, որը վերջին տարիներին ընդլայնվել է, և որի շրջանակներում մատուցվել է սրտի անհետաձգելի վիրահատական շուրջ 14 հազար ծառայություն: Գլխուղեղի սուր կամ ենթասուր իշեմիկ կաթվածների բուժման ծրագիր, որի շնորհիվ 3 տարում կարողացել ենք փրկել շուրջ 1300 կյանք»,- նշել է Արտակ Ջումայանը և փաստել, որ, կարևորելով ոլորտի զարգացման և բարելավման անհրաժեշտությունը, 2022 թվականի փետրվարին ստեղծվել է սրտանոթային հիվանդությունների բուժման արդյունավետության բարձրացման և կառավարման համակարգող խորհուրդ, որի կազմում ընդգրկված են հանրապետության լավագույն մասնագետները:
Սրանք այն առանցքային քայլերն են, որոնք նպաստելու են արյան շրջանառության համակարգի/սրտանոթային հիվանդություններից մահացության և հաշմանդամության նվազեցմանը, և ամենակարևորը` բնակչության առողջության բարելավմանը:
Երկօրյա հանդիպման ընթացքում մասնագետները հնարավորություն կունենան քննարկելու սրտանոթային հիվանդությունների ախտորոշման, բուժման և շարունակական հսկողության արդի և նորարարական մոտեցումները:

 

Related posts

Իմ դիրքորոշումը հստակ է՝ կլինի սուր, բայց կանոնավոր բառապաշարով քննադատություն, կվարվեմ նույն կերպ, կլինի հարգանք՝ կարձագանքեմ հարգանքով․ վարչապետ

Տպավորություն է՝ միջպետական հարաբերությունները փչացնելու հատուկ քայլեր են արվում․ Կիսելյովը՝ «Սպուտնիկ Ադրբեջան»-ի աշխատակիցների ձերբակալման մասին

«Ոչ մի օգուտ չկա հակակարկտայինից»․ այգեգործը պետությունից նոր լուծումներ է ակնկալում