Առաջիկայում մենք պիտի զբաղվենք կառավարության ծրագրի և ծրագրի իրականացման միջոցառումների գործողությունների ցանկը հաստատելու գործով. նոր ձևավորված կառավարության անդրանիկ նիստում հայտարարեց ՀՀ վարչապետ Նիկոլ Փաշինյանը: Նա տեղեկացրեց, որ առայժմ չի նշանակվել միայն արտաքին գործերի նախարարը: Փաշինյանը Երկրի կառավարման գործում հաջողություն մաղթեց գործադիրի անդամներին:
«Մեր ծրագիրը, բնականաբար, պիտի հենված լինի «Քաղաքացիական պայմանագիր» կուսակցության նախընտրական ծրագրի՝ մինչև 2050 թվականի վերափոխման ռազմավարության վրա, ինչպես նաև նախընտրական քարոզարշավի ընթացքում ժողովրդի հետ երկխոսության ընթացքում ձևավորված նախընտրական խոստումների վրա:
Նախընտրական քարոզարշավը, առավել ևս այս նախընտրական քարոզարշավը կենդանի գործընթաց է, և այս նախընտրական քարոզարշավի ամենակարևոր առանձնահատկությունն այն է, որ կենդանի երկխոսություն ստացվեց ՀՀ քաղաքացիների հետ: Մենք կառավարության ծրագիրը կազմելիս պետք է ոչ միայն ուսումնասիրենք կամ հենվենք այն գրավոր փաստաթղթերի վրա, որոնք ընդունվել են մինչև նախընտրական ծրագիրը, նաև այն ըմբռնման վրա, որ ձևավորվել է քաղաքացիների հետ կենդանի շփման արդյունքում»,- ասաց Փաշինյանը:
Փաշինյանի խոսքով՝ մինչև օգոստոսի 23-ը ժամանակ կա՝ կառավարության ծրագիրն Ազգային ժողով ներկայացնելու համար: