Վրաստանում իրենց քվեարկությունն արդեն կատարել են Վրաստանի վարչապետ Իրակլի Կոբախիձեն, նախագահ Սալոմե Զուրաբիշվիլին և խորհրդարանի նախագահ Շալվա Պապուաշվիլին։
Կոբախիձեն քվեարկել է Թբիլիսիի արեւմուտքում գտնվող ընտրատեղամասերից մեկում։
«Մենք պետք է հիշեցենք, որ այս ընտրությունները համարժեք են հանրաքվեի: Ես կոչ եմ անում բոլոր կողմերին ճանաչել ընտրությունների արդյունքները, որոնք կհրապարակի Կենտրոնական ընտրական հանձնաժողովը»,- ասել է Կոբախիձեն:
Զուրաբիշվիլին իր հերթին շնորհավորել է Վրաստանի ժողովրդին օրվա կապակցությամբ՝ այն անվանելով երջանիկ։
«Ես քվեարկել եմ նոր Վրաստանի օգտին: Այն Վրաստանի օգտին, որի համար եկել եմ այս երկիր 22 տարի առաջ: Այս գիշեր մենք հաղթող ենք լինելու, ոչ ոք չի պարտվելու, քանի որ Վրաստանը հաղթելու է»,- լրագրողներին ասել է նախագահը։
Խորհրդարանի նախագահը ևս քվեարկությունից հետո զրուցել է լրագրողների հետ՝ նշելով, որ «Վրացական երազանք»-ը Վրաստանի միակ ընտրությունն է։
«Այսօր ընտրություն է կատարվում չարի և բարու, անաստվածության և ոգեղենության միջև»,- ասել է Պապուաշվիլին:
Ինչպես ավելի վաղ հայտնել էինք, Վրաստանում մեկնարկել է խորհրդարանական ընտրությունը։ 08։00-ին բացվել են երկրի բոլոր ընտրական տեղամասերը։ Քվեարկությունը կշարունակվի մինչև 20։00, որից հետո կսկվի ձայների հաշվարկը: