Խորհրդարանը նոյեմբերի 17-ի նիստում քննարկել է «ՀՀ 2022 թվականի պետական բյուջեի մասին» օրենքի նախագիծը:
ԱԺ ֆինանսավարկային եւ բյուջետային հարցերի մշտական հանձնաժողովի նախագահ Գեւորգ Պապոյանն անդրադարձել է 2022-ին նախորդող տնտեսական գործընթացներին: Նշվել է, որ տնտեսական աճի բովանդակության իմաստով 2021 եւ 2022 թթ. տարբեր են. առեւտրի, ծառայությունների ոլորտներից, գյուղատնտեսությունից անցում է կատարվում արդյունաբերության ու շինարարության ոլորտների առաջանցիկ տեմպերի ապահովմանը:
Կանխատեսվում է, որ արդյունաբերությունը պետք է աճի 8, շինարարությունը՝ 18, ծառայությունները՝ 5,9, գյուղատնտեսությունը՝ 3,9 տոկոսով: 46,2 տոկոս պետական ներդրումների աճ է կանխատեսվում. հիմքում ավելի քան 350 մլրդ դրամի կապիտալ ներդրումների ծախսն է լինելու: Գեւորգ Պապոյանի խոսքով՝ վերջին տարիներին մեր երկրում կապիտալ ներդրումների ծավալները եւ սահմանված ցուցանիշներն անընդհատ աճել են: Ներկայացնելով վիճակագրական տվյալներ՝ հանձնաժողովի նախագահը նշել է, որ 2020 թ. կապիտալ ներդրումների կատարողականը եղել է 85 տոկոս, այս տարի կանխատեսվում է փաստացի 90 եւ ավելի տոկոս, 2012-ին այն կազմել է 75, իսկ 2013-ին՝ 58 տոկոս: «Կապիտալ ներդրումները մեզ համար առաջնահերթություն են»,-փաստել է Գեւորգ Պապոյանը:
Նշվել է, որ մասնավոր ներդրումների 15,6 տոկոս աճ է կանխատեսվում, այս հարցում մի շարք հանգամանքներ իրենց ազդեցությունն են ունենում:
2021 թ. հունվար-հուլիս ամիսներին էականորեն աճել է նաեւ միջին անվանական աշխատավարձը մոտ 6 տոկոսով՝ կազմելով գրեթե 200.000 դրամ: Ըստ կանխատեսումների՝ եկող տարվա գնաճի ցուցանիշը կլինի թիրախի՝ 4 տոկոսի սահմանում, ինչը հնարավորություն կտա զգալիորեն ավելացնել մարդկանց փաստացի տնօրինվող եկամուտները:
Հանձնաժողովի նախագահը խոսել է պետական բյուջեի մակրոտնտեսական շրջանակի, ներդրումային քաղաքականության, երկարաժամկետ ծրագրերի իրականացման, բյուջեի արդյունքային ցուցանիշների կարեւորության մասին:
Գեւորգ Պապոյանը տեղեկացրել է, որ հանձնաժողովը բյուջետային փաստաթղթի վերաբերյալ ներկայացրել է դրական եզրակացություն՝ կոչ անելով գործընկերներին կողմ քվեարկել նախագծին: