Երբ մենք ասում ենք, որ Ադրբեջանն ագրեսիա է իրականացրել Հայաստանի նկատմամբ, նկատի ունենք, որ նաև որոշակի տարածքի նկատմամբ հսկողություն է սահմանել, և այս է պատճառը, որ մենք դիմել ենք ՀԱՊԿ-ին: Այդ մասին ԱԺ-Կառավարություն հարցուպատասխանի ժամանակ ասաց ՀՀ վարչապետ Նիկոլ Փաշինյանը:
Վարչապետի խոսքով՝ շատ շահարկումներ կան, թե ո՛ր հոդվածի հիման վրա է Կառավարությունը դիմել ՀԱՊԿ-ին:
«Մենք ՀԱՊԿ-ին դիմել ենք Հավաքական անվտանգության պայմանագրի 4-րդ հոդվածի հիման վրա, երբ ասվում է, թե անդամ երկրներից մեկի ագրեսիան համարվում է ագրեսիա մյուս երկրների նկատմամբ: Մենք ՀԱՊԿ-ից խնդրել ենք, դիմել ենք օգնություն, աջակցություն, այդ թվում՝ ռազմական, Հայաստանի տարածքային ամբողջականությունը վերականգնելու և Հայաստանի տարածքից Ադրբեջանի զինված ուժերի դուրսբերումը ապահովելու համար:
Սա ֆիքսում ենք քաղաքական նպատակ, որ ագրեսորը ՀՀ-ից պետք է դուրս գա»,- ասաց Փաշինյանը՝ տեղեկացնելով, որ երեկ ՀԱՊԿ նիստ է եղել, և իրավիճակի գնահատման առումով նվազագույն անհրաժեշտ որոշումներն այս փուլի համար կայացվել են: