Ուկրաինայի գլխավոր հետախուզական վարչության ղեկավար Կիրիլ Բուդանովը Ղրիմում զինամթերքի պահեստի պայթյունն անվանել է հետախուզության և Ուկրաինայի զինված ուժերի հատուկ գործողություն։ Այդ մասին գրում է Strana.ua-ն։
Բուդանովը շնորհակալություն է հայտնել տեղի բնակիչներին՝ պահեստների գտնվելու վայրի մասին տեղեկություններ տրամադրելու, ինչպես նաև տեղի ունեցած պայթյունների տեսագրությունը տրամադրելու համար։
Ղրիմի Կիրովսկի շրջանի զինափորձարանի զինամթերքի պահեստում բռնկված հրդեհի մասին հայտնի է դարձել հուլիսի 19-ի վաղ առավոտյան։ Ղրիմի ղեկավար Սերգեյ Ակսյոնովը Telegram-ի իր ալիքում հաստատել է հրդեհի փաստը, ռուսական կողմը միջադեպի պատճառները չի նշել։
Ակսյոնովը հայտնել է, որ վտանգի գոտուց պատրաստվում են ժամանակավոր տարհանել չորս բնակավայրի բնակիչների՝ ավելի քան 2 հազար մարդու։ Տեղակայված է օպերատիվ շտաբ, տեղում աշխատում են բոլոր մասնագիտացված ծառայությունները։
Հրշեջները շարունակում են մարել կրակը։ Բնակելի շենքերին վտանգ չի սպառնում, ըստ նախնական տվյալների, տուժածներ չկան:
«Երբ Ուկրաինայի հետախուզության գլխավոր վարչությունը ստանձնեց Ղրիմում զինամթերքի պահեստի պայթեցումը, պետք է հետևեն պատասխան միջոցներ»,- ասել է Պետդումայի միջազգային հարցերով հանձնաժողովի նախագահի առաջին տեղակալ Ալեքսեյ Չեպան։