Մեծ Բրիտանիայում այսօր ավելի քան 45 հազար երկաթուղային աշխատողներ հերթական գործադուլի շրջանակներում աշխատանքի դուրս չեն եկել, ինչը մեծ հարված է հասցրել երկրի երկաթուղային ցանցին:
Երկրի երկաթուղիների մեծ մասը և Լոնդոնի բոլոր կենտրոնական կայարանները սպասարկող Network Rail ընկերության հայտարարության մեջ նշված է, որ շաբաթ օրը կգործի նախատեսված ուղևորափոխադրումների ընդամենը 20 տոկոսը:
Գործադուլ էր կազմակերպվել նաև օգոստոսի 18-ին, իսկ նախօրեին երկաթուղայիններին միացել էին Լոնդոնի մետրոպոլիտենի աշխատակիցները և մայրաքաղաքի ավտոբուսների վարորդները:
Հուլիսի վերջին համանման գործադուլին մասնակցել են բրիտանական երկաթուղիների ավելի քան 40 հազար աշխատակիցներ: Գործադուլների շարքի պատճառը աշխատակիցների աշխատավարձերի բարձրացումը սառեցնելու և նրանց մի մասին աշխատանքից հեռացնելու, աշխատանքային օրվա տևողությունը երկարացնելու, անվտանգության ստուգումները կրճատելու, տոմսերի վաճառքի բոլոր դրամարկղերը փակելու վերաբերյալ ընկերությունների որոշումների հետ աշխատակիցների անհամաձայնությունն է: