Հայաստանն ու Ռուսաստանը շարունակում են լինել ռազմավարական դաշնակիցներ:
Այս մասին ասուլիսի ժամանակ ասել է ՀՀ պաշտպանության նախարար Սուրեն Պապիկյանը՝ անդրադառնալով Հայաստանի կատարած վճարումների դիմաց Ռուսաստանից զենքի չմատակարարմանը:
«Հայ–ռուսական հարաբերությունները շարունակվում են: Ոչ Հայաստանն է իր տեղից հեռանալու, ոչ Ռուսաստանը: Մենք շարունակում ենք լինել ռազմավարական դաշնակիցներ: Բնականաբար, մենք ունենք նաև գործող պայմանագրեր: Կարող է և պետք է ունենանք սպասարկման պայմանագրեր: Սրանք հարցեր են, որոնցից ոչ ռուսական կողմը, ոչ մենք չենք խուսափում, և պետք է չխուսափենք»,- ասել է նախարարը:
Պապիկյանը հիշեցրել Ֆինանսների նախարարի հայտարարությունը, որով վերջինս տեղեկացրել էր, որ Հայաստանի և Ռուսաստանի ֆինանսների նախարարությունների միջև ձեռքբերված պայմանավորվածությամբ ՀՀ-ի կողմից վճարված գումարը միջպետական պարտքից պետք է պակասեցվի:
«Կդժվարանամ ասել՝ այն կյանքի կոչման որ հատվածում է, բայց նմանատիպ պայմանավորվածություն ձեռք է բերվել: Պետք է ասեմ, որ սա միակ ընթացիկ պայմանագիրը չի եղել Հայաստանի և Ռուսաստանի միջև: Բնական է՝ կան պարտավորություններ, որոնք ուշացումների բերումով կարող են ունենալ իրենց պայմանագրային հետևանքները՝ տույժ-տուգանքներ և այլն: Սակայն նաև պայմանագրեր կան, որոնք պատշաճ կատարվում են»,- տեղեկացրել է Սուրեն Պապիկյանը: