ՀՀ հակակոռուպցիոն կոմիտեի նախագահ Արթուր Նահապետյանի գլխավորությամբ այսօր անցկացվել է հերթական աշխատանքային խորհրդակցությունը, որի ընթացքում Կոմիտեի նախագահն անձնակազմին է ներկայացրել նորանշանակ գլխավոր քարտուղար Կարեն Մարգարյանին, շնորհավորել նրան նշված պաշտոնում նշանակվելու կապակցությամբ և մաղթել արդյունավետ աշխատանք: Այս մասին տեղեկացնում են Հակակոռուպցիոն կոմիտեից:
Խորհրդակցության ընթացքում Արթուր Նահապետյանն անդրադարձել է Կոմիտեի օպերատիվ–հետախուզական գործունեություն իրականացնող ստորաբաժանումում տեղի ունեցած կառուցվածքային փոփոխություններին: Ըստ Կոմիտեի նախագահի՝ փոփոխությունների հիմնական նպատակն է՝ հասնել օպերատիվ ստորաբաժանման գործառույթների հստակեցմանը, լիազորությունների համաչափ բաշխմանը և ռեսուրսների առավել օպտիմալ օգտագործմանը և վերջնարդյունքում՝ աշխատանքի արդյունավետության բարձրացմանը։
Օպերատիվ ստորաբաժանման կառուցվածքը ձևավորվել է ըստ գործառույթների հստակ տարանջատման և մասնագիտացման սկզբունքի՝ նկատի ունենալով այն հանգամանքը, որ հակակոռուպցիոն պայքարի արդյունավետությունը մեծապես պայմանավորված է իրավապահ մարմնի ներսում գործող կառուցվածքային ստորաբաժանումների հստակ կազմակերպմամբ, դրանց նպատակային և համակարգված գործունեությամբ:
Փոփոխության արդյունքում օպերատիվ մեկ ստորաբաժանման հենքի վրա ձևավորվել է ինքնուրույն կառուցվածքային միավոր հանդիսացող չորս օպերատիվ ստորաբաժանում: Հակակոռուպցիոն կոմիտեի նախագահի հրամանով՝ նույն վարչությունների կազմում ստեղծվել են նախադեպը չունեցող մարզային ստորաբաժանումներ՝ Լոռու և Շիրակի, ինչպես նաև Սյունիքի և Վայոց ձորի տարածքային բաժինները, ինչը թույլ կտա արագ արձագանքել կոռուպցիոն ահազանգերին, իրականացնել ոչ միայն հետախուզական, այլ նաև կանխարգելիչ աշխատանք՝ նպաստելով հանրային վստահության մակարդակի բարձրացմանը:
Արթուր Նահապետյանն ընդգծել է, որ Հակակոռուպցիոն կոմիտեի գործունեության նկատմամբ հանրության ակնկալիքները մեծ են, ուստի պետք է հնարավոր բոլոր ջանքերը գործադրել այդ սպասելիքներն արդարացնելու և կառույցի գործունեության արդյունավետությունն էլ ավելի բարձրացնելու նպատակով: