Սուսերամարտիկ Յանա Եգորյանը Թբիլիսիում կայացած Սուսերամարտի աշխարհի առաջնությունում ոսկե մեդալ է նվաճել՝ դառնալով աշխարհի եռակի չեմպիոն:
31-ամյա Եգորյանը ներկայացնում է Ռուսաստանի հավաքականը, որը առաջնությունում հանդես է գալիս չեզոք դրոշի ներքո։
Վճռորոշ գոտեմարտում նա 15:11 հաշվով հաղթել է լեհ մարզուհի Զուզանա Չեշլարին: Օլիմպիական կրկնակի չեմպիոն Յանա Եգորյանին այս հաղթանակը բերեց աշխարհի առաջնությունների արդեն երրորդ ոսկե մեդալը (նախորդ մեդալները նվաճել էր 2015 և 2019 թվականներին):
Թբիլիսիում կայացած աշխարհի առաջնությունը 2019 թվականից ի վեր առաջինն է, որտեղ ռուս սուսերամարտիկները ներկայացված են ամբողջ կազմով, թեև շարունակում են հանդես գալ չեզոք կարգավիճակով: Նշենք, որ մրցաշարն անցկացվում է Վրաստանի մայրաքաղաքում հուլիսի 22-30-ը: