Եվրոպական խորհրդի նախագահ Շառլ Միշելն անդրադարձել է Կախովկայի հիդրոէլեկտրակայանի ամբարտակի պայթեցմանը։
«Ցնցված եմ ամբարտակի վրա աննախադեպ հարձակումից։ Քաղաքացիական ենթակառուցվածքի ոչնչացումը միանշանակ որակվում է որպես ռազմական հանցագործություն, և մենք պատասխանատվության կենթարկենք Ռուսաստանին և նրա խամաճիկներին»,- Twitter-ի իր միկրոբլոգում գրել է Միշելը։
Նա տեղեկացրել է, որ հարցը կքննարկվի հունիսին՝ Եվրոպական խորհրդում, և ԵՄ-ն լրացուցիչ օգնություն կառաջարկի տուժած շրջաններին։
Հիշեցնենք, որ հունիսի 6-ի գիշերը պայթյունի հետևանքով «Կախովսկայա» հիդրոէլեկտրակայանի ամբարտակը փլուզվել է։ Այժմ մոտ 80 բնակավայր գտնվում է հեղեղումների վտանգի տակ։ Իշխանություններն արդեն իրականացնում են տարհանում, Դնեպրի աջ ափի կրիտիկական գոտում 16 հազար մարդ կա։
Կատարվածի համար Ուկրաինան ու Ռուսաստանն իրար են մեղադրում: Ուկրաինան գործ է հարուցել էկոցիդի հոդվածով՝ Կախովսկայա հիդրոէլեկտրակայանի պայթյունի պատճառով։