ԱԺ-Կառավարություն հարցուպատասխանի ընթացքում ՀՀ տարածքային կառավարման և ենթակառուցվածքների նախարար Գնել Սանոսյանը պատասխանեց աղետի գոտում իրականացվող աշխատանքների, բնակարանային ապահովության ծրագրի մասին հարցին:
«2008 թվականից սկսված բնակարաններով ապահովման ծրագիրը ավարտական փուլում է: Այդ խմբում ընդգրկվել է 5419 ընտանիք, նրանցից միայն 28-ն են, որ չեն ստացել համապատասխան բնակարանը կամ ֆինանսական միջոցները: Այդ 28 ընտանիքները Շիրակի մարզի Ջրաձոր գյուղի բնակիչներն են: Կապսի ջրամբարի կառուցման հետ կապված՝ ունենք ծրագիր, որ Ջրաձոր գյուղը պետք է տեղափոխել: Կա նախնական որոշակի տրամադրվածություն, որ այդ գյուղի տեղափոխման և նոր բնակավայրի կառուցման գործընթացին զուգահեռ նաև այդ 28 ընտանիքի բնակարանով ապահովման հարցը կկարգավորվի»,- ասաց Սանոսյանը:
Ինչ վերաբերում է տնակների խնդրին, Սանոսյանը նշեց, որ դեռ 2018 թվականից բավական մանրակրկիտ ուսումնասիրվել է խնդիրը:
«2023 թվականին որոշակի փաստաթղթային, տեխնիկական, առկա ինֆորմացիայի ճշգրտման աշխատանքներ կիրականացվեն, իսկ 2024-2027 թթ. այդ տնակները կհանվեն, և դրանցում ապրող կամ դրանց սեփականատեր հանդիսացող մեր քաղաքացիներին ըստ կարգավորումների կտրվեն գումարներ կամ բնակարաններ»,- ասաց նախարարը: