Գյումրու «Մայր Հայաստան» հուշահամալիրի տարածքում՝ «Ոսկե բլուր» ռեստորանային համալիրի մոտակայքում՝ «Օզանյան», «Մարտի 8-ի» փողոց և «Ղարսի» խճուղի խաչմերուկների աջակողմյան հատվածում այսօր մարտական հակահետևակային ական է հայտնաբերվել:
Ահազանգը մարզի փրկարարական վարչությունը ստացել է քաղաքի բնակիչներից մեկից։ Անմիջապես մասնագիտական խումբը մեկնել է դեպքի վայր:
«Երբ պարզվեց, որ գտնվածը մարտական հակահետևակային ական է, կանչվեցին սակրավորներ՝ Գյումրիում տեղակայված N զորամասից: Տեղում էլ հստակեցվեց, որ ականը մարտական վիճակում է և տեղափոխման ենթակա չէ: Որոշում կայացվեց տեղում այն վնասազերծել»,- ՀԺ-ի հետ զրույցում ասաց ճգնաժամային կառավարման կենտրոնի ավագ հրահանգիչ Գոռ Ավետիսյանը:
Սակրավորները վնասազերծումն իրականացրել են ժ․17:50-ին՝ տարածքում համապատասխան անվտանգության բոլոր նորմերի խիստ պահպանմամբ:
Նշենք, որ ականը հայտնաբերվել է հողային աշխատանքների ժամանակ: Ըստ նշված կենտրոնի պատասխանատուի, այն կոռոզիայի ենթարկված չի եղել: