Ալիևը Պուտինից ներողություն է խնդրել սեպտեմբերի 20-ին Լեռնային Ղարաբաղում ռուս զինծառայողների մահվան կապակցությամբ

Ադրբեջանական կողմի նախաձեռնությամբ տեղի է ունեցել Ռուսաստանի և Ադրբեջանի նախագահների հեռախոսազրույցը:

«Իլհամ Ալիևը ներողություն է խնդրել և խորին ցավակցություն հայտնել սեպտեմբերի 20-ին Ղարաբաղում ռուսական խաղաղապահ զորակազմի զինծառայողների ողբերգական մահվան կապակցությամբ: Ընդգծվել է, որ տեղի ունեցածի առավել մանրակրկիտ հետաքննություն կանցկացվի, և բոլոր մեղավորները պատշաճ պատիժ կկրեն: Այդ կապակցությամբ երկու երկրների գլխավոր դատախազությունները սերտ կապի մեջ են։ Ադրբեջանի նախագահը նաև պատրաստակամություն է հայտնել նյութական օգնություն ցուցաբերել զոհվածների ընտանիքներին»,- նշված է Կրեմլի տարածած հաղորդագրության մեջ:

Կողմերը կարևորել են ռուս խաղաղապահների միջնորդությամբ Բաքվի և Ստեփանակերտի ներկայացուցիչների միջև սկսված բանակցությունները։

«Քննարկվել են տարածաշրջանում իրավիճակի հետագա կայունացման և հումանիտար խնդիրների հաղթահարմանն ուղղված առաջնահերթ քայլերը: Վլադիմիր Պուտինը շեշտել է Ղարաբաղի հայ բնակչության իրավունքների և անվտանգության ապահովման կարևորությունը։ Հաստատվել է ադրբեջանական կողմի պատրաստակամությունը՝ այդ հարցերի շուրջ փոխգործակցել ռուս խաղաղապահների հետ»,- հայտնել են Կրեմլից։

Related posts

ՊԵԿ նախագահը՝ շրջհարկի փոփոխությունների առնչությամբ քաղաքացիների դժգոհությունների մասին

Լոս Անջելեսում միգրացիոն քաղաքականության դեմ անցկացվող բողոքի ցույցերը վերաճել են լարված բախումների

Պաշտոնատար անձի ուղղորդմամբ քաղաքացին սուտ ցուցմունք է տվել. քրեական վարույթի նյութերը դատարանում են