Լավ պայմաններով խաղաղության պայմանագիր կնքելու համար հարկավոր է պատերազմներ հաղթել, կամ գոնե չպարտվել դրանցում: Այս մասին մարտի 4-ին ռուսական առաջատար լրատվամիջոցներին տված մամուլի ասուլիսում հայտարարել է Հայաստանի նախկին նախագահ Ռոբերտ Քոչարյանը, Tert.am-ի փոխանցմամբ այս մասին գրում է Красная Весна հրատարակությունը:
«Մեզ դո՞ւր է գալիս այս հայտարարությունը (Ղարաբաղի վերաբերյալ): Ոչ: Բայց լավ համաձայնագրեր ունենալու համար պետք է պատերազմում հաղթել, կամ գոնե դրանցում չպարտվել»,-ասել է Քոչարյանը:
Նրա խոսքով ՝ պատերազմում պարտված կառավարությունը պետք է ծնկաչոք ներողություն խնդրի ժողովրդից:
Նա ընդգծել է, որ նոյեմբերի 10-ի փաստաթուղթը «1,5 էջանոց հայտարարություն է: Նման հարցերը չեն լուծվում 1,5 էջով: Պետք է շատ փաստաթղթեր մշակվեն մանրամասներով»:
Սակայն ներկայիս իշխանությունները ի վիճակի չեն արժանապատիվ բանակցություններ վարել, և եթե նրանք մտածեին երկրի մասին, ապա նրանք կհեռանային՝ տեղը զիջելով այն մարդկանց, որոնք կարող են բանակցել, ասել է նախկին նախագահը:
Քոչարյանը հիշեցրել է, որ պատերազմից հետո շատ լուրջ կասկածներ են արտահայտվել կառավարության և Փաշինյանի մի շարք գործողությունների վերաբերյալ, ընդ որում որևէ հարցի վերաբերյալ դեռ լուրջ բացատրություն չի ստացվել:
«Կարծում եմ, որ սա ծրագրված պարտություն էր», -ասել է նախկին նախագահը: