Բաթումիում հարձակման է ենթարկվել Վրաստանի նախկին վարչապետ, «Հանուն Վրաստանի» ընդդիմադիր կուսակցության առաջնորդ Գիորգի Գախարիան։
Այս մասին սոցիալական ցանցում հայտնել է կուսակցության անդամ Նատիա Մեզվրիշվիլին։
Նա նշել է, որ Բաթումիի «Շերատոն» հյուրանոցում ֆիզիկական բռնության ենթարկված Գախարիային տեղափոխվել է կլինիկա:
Կլինիկայի տվյալներով՝ հարձակման հետևանքով նախկին վարչապետը քթի կոտրվածք և ուղեղի ցնցում է ստացել։ Բժիշկ Տակո Շանթաձեի խոսքով՝ Գախարիան, ում գիշերը շտապօգնության խումբը տեղափոխել է կլինիկա, անգիտակից է եղել։
Նրա վիճակը գնահատվում է կայուն, և նա բուժօգնություն ստանալուց հետո ինքնակամ լքել է կլինիկան։
«Հանուն Վրաստանի» կուսակցությունը կատարվածի համար մեղադրել է իշխող կուսակցությանը։ Նաթիա Մեզվրիշվիլին նշել է, որ դեպքի հետ կապված «ապացույցների ոչնչացումն» արդեն սկսվել է։