Փաշինյանն ընթերցել է քաղաքացուն ուղղված նամակը

Արարատի բնակչության հետ այսօրվա հանդիպումների շարքը Նիկոլ Փաշինյանն ավարտել է մարզկենտրոն Արտաշատում, որտեղ ընթերցել է քաղաքացուն ուղղված նամակ: Նա նշել է, որ «Քաղաքացիական պայմանագիր» կուսակցության նախընտրական թերթիկի դարձերեսին լինելու է այդ նամակը:

«Բարև Հայաստանի Հանրապետության քաղաքացի, քեզ դիմում է Հայաստանի Հանրապետության քաղաքացի, չորս երեխաների հայր, «Հայկական ժամանակ» օրաթերթի նախկին գլխավոր խմբագիր, նախկին քաղբանտարկյալ, 2012-18 թվականներին Ազգային ժողովի պատգամավոր, 2017-18 թվականներին Ազգային ժողովի «Ելք» խմբակցության ղեկավար, Հայաստանի Հանրապետության վարչապետ, վարչապետի պաշտոնակատար և վարչապետի թեկնածու Նիկոլ Փաշինյանը:

Ի՞նչ եմ ակնկալում քեզանից: Ուզում եմ չհանձնվես, ուզում եմ չկասկածես: Քեզ փորձում են համոզել, որ դու սխալվել ես՝ մտածելով, թե կարող ես որոշող լինել քո հայրենիքում, քո պետության մեջ: Քեզ փորձում են համոզել, թե ժամանակը հակառակը ցույց տվեց, որ կամ պետք է հպատակ լինես քո հայրենիքում կամ կորցնես հայրենիքդ: Ես քեզ դիմում եմ համոզմունքով, որ ճշմարտությունն ուղիղ հակառակն է: Երկար տարիներ մենք շատ բաներ հանդուրժեցինք հանուն հայրենիքի, արդյունքում պարզվեց, որ հայրենիքի քայքայումն ենք հանդուրժում: Ու այն պահին, երբ սկսեցինք չհանդուրժել, մեր հայրենիքը նմանվում էր անդունդ գահավիժող մի մեքենայի, որը փորձում էինք կառավարել` առանց ղեկի ու անիվների, առանց արգելակի ու շարժիչի:

Գահավիժման այդ ընթացքը դժվարությամբ ենք կանգնեցնում, ծանր կորուստներով, բազմաթիվ զոհերով, խառնակ ու խառնաշփոթ ժամանակներով: Ու հիմա ընտրության առաջ ես` ենթարկվես ժամանակի՞ն, թե՞ քեզ ենթարկես ժամանակը: Ես ուզում եմ, որ քեզ ենթարկես ժամանակը, որովհետև այն ժամանակը, որը քեզ ենթակա չէր երեկ, այսօրվա կորուստների առանցքային պատճառն է: Այսօրվա բարդությունը կուտակվել է երեկ:

Հիշո՞ւմ ես, թե քանի-քանի առիթներով և քանի-քանի տարիներ ես ապրել այն համոզումով, որ այս երկրում ապագա չկա ու այն ժամանակ, երբ փոխում էիր համոզումդ, վրա հասավ ամենամեծ աղետը ու էլի սկսեցիր մտածել, որ ապագա չկա: Բայց այս օրն ապագա էր երեկ, իսկ վաղն ապագա է այսօր ու այն պետք է գա, եթե դու որոշես, որ ինքը կա, որովհետև ցավից չպետք է կորցնես ապագայի մասին երազելու և ապագան ամենօրյա աշխատանք դարձնելու կարողությունը: Բարև Հայաստանի Հանրապետության քաղաքացի, քեզ գրում եմ՝ ասելու, որ ապագա կա′, կա′ ապագա ու այն արարելու ենք այսօր: Քո Նիկոլ»,- շեշտվում է Փաշինյանի նամակում:

Մարզկենտրոնի հանդիպումից հետո վարչապետի պաշտոնակատարի առաջնորդությամբ Արտաշատում երթ է անցկացվել:

Related posts

ՔՊ վարչության նիստում քննարկվել են կուսակցական, քաղաքական և հանրային կարևորություն ունեցող հարցեր

Սահմանազատման գործընթացի վերաբերյալ բոլոր հարցերը քննարկվում են բացառապես պետական հանձնաժողովների համատեղ աշխատանքների շրջանակներում․ Մհեր Գրիգորյանի գրասենյակ

Աննա Հակոբյանը բարձրագույն կրթությունը կշարունակի Չինաստանում, Մարինե Հակոբյանը կսովորի Խաչատուր Աբովյանի անվան մանկավարժական համալսարանում