2025 թվականի մարտի 14-ին տեղի կունենա 2025 թվականի առաջին Լուսնի խավարումը:
Այս մասին սոցցանցի իր էջում գրում է «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանը՝ մանրամասնելով.
«Դա կլինի Լուսնի ամբողջական խավարում, որը տեսանելի կլինի Հյուսիսային և Հարավային Ամերիկաներում, Ավստրալիայի մեծ մասում, Արևմտյան Եվրոպայում, Արևելյան Ասիայում, Խաղաղ և Ատլանտյան օվկիանոսներում, Արկտիկայում և Անտարկտիդայում:
Խավարումը կսկսվի Երևանի ժամանակով 07:57-ին և կավարտվի 14:00-ին: Դրա տևողությունը կկազմի 6 ժամ, իսկ լրիվ խավարումը կդիտվի 10:26-ից մինչև 11:31-ը։ Խավարման առավելագույն փուլը կդիտվի 10:58-ին։ Ամբողջական խավարման ժամանակ Լուսինը կստանա բնորոշ կարմրավուն երանգ, պայմանավորված Երկրի մթնոլորտում արևի լույսի բեկումով։ Այդ երևույթը հաճախ անվանում են «արյունոտ լուսին»:
Հայաստանում լուսնի ամբողջական խավարումը տեսանելի չի լինի, քանի որ այն տեղի կունենա ցերեկային ժամերին և Լուսինը կլինի հորիզոնից ցածր»։