Ադրբեջանի վարչապետ Ալի Ասադովը նշել է իր երկրի և Հայաստանի միջև տնտեսական և տրանսպորտային կապերի ապաշրջափակման հարցում առաջընթացի բացակայությունը, հայտնում է minval.az-ը։
«Չնայած եռակողմ աշխատանքային խմբի շրջանակներում (Ռուսաստանի, Հայաստանի, Ադրբեջանի փոխվարչապետների մակարդակով) ընթացող հանդիպումներին, եռակողմ հայտարարության 9-րդ կետի համաձայն տարածաշրջանում տնտեսական և տրանսպորտային կապերի ապաշրջափակման հարցում առաջընթաց չկա», – ասել է նա՝ ելույթ ունենալով ԱՊՀ երկրների կառավարությունների ղեկավարների խորհրդի նիստում:
Ասադովը նշել է, որ Ադրբեջանը Հայաստանից ակնկալում է Ադրբեջանի, Ռուսաստանի և Հայաստանի ղեկավարների 2020 թվականի նոյեմբերի 9-ի եռակողմ հայտարարությամբ ստանձնած պարտավորությունների ամբողջական կատարում։
Նա, մասնավորապես, հայտնել է ադրբեջանական կողմի մտահոգությունն առ այն, որ եռակողմ հայտարարության 4-րդ կետը, որը նախատեսում է «հայկական զինված կազմավորումների» (չակերտները՝ Tert.am) դուրսբերում «Ադրբեջանի տարածքից» (չակերտները՝ Tert.am), մնում է անկատար։
Ադրբեջանի վարչապետը հավելել է, որ Բաքուն «մոտ ապագայում լուրջ առաջընթաց է ակնկալում երկու հարցերում և անհրաժեշտ է համարում այդ ուղղությամբ քայլեր ձեռնարկել»։