Սոչիում սկսվել են Ռուսաստանի նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի միջև բանակցությունները՝ հայտնում է ТАСС-ը:
Ռուսաստանի նախագահ Պուտինը շնորհակալություն է հայտնել Թայիփ Էրդողանին Ռուսաստան կատարած այցի համար՝ նշելով, որ համաճարակի պատճառով նրանք մեկուկես տարի չեն հանդիպել, չնայած այդ ամբողջ ընթացքում մշտական կապի մեջ էին:
Ավելի վաղ Կրեմլը հայտնել էր, որ առաջիկա քննարկումների առանցքային թեմաները կլինեն Անկարայի և Մոսկվայի քաղաքական ու տնտեսական համագործակցության հարցերը: Պետությունների ղեկավարները կարծիքներ կփոխանակեն Սիրիայի, Լիբիայի, Աֆղանստանի և Կովկասի իրավիճակի վերաբերյալ:
Օգոստոսին Էրդողանը հայտարարել էր, որ Ռուսաստան առաջիկա այցի ընթացքում մտադիր է, ի թիվս այլ հարցերի, քննարկել S-400 զենիթահրթիռային համալիրների երկրորդ խմբաքանակի գնման մանրամասները:
Ռուսաստանի նախագահի մամուլի քարտուղար Դմիտրի Պեսկովը հայտնել է, որ նախագահները դեմ առ դեմ զրույց կունենան թարգմանիչների մասնակցությամբ, այնուհետև առաջնորդները կշարունակեն խոսել աշխատանքային նախաճաշի ժամանակ:
Ավելի վաղ Պեսկովը ТАСС-ին ասել էր, որ բանակցություններից հետո փաստաթղթերի ստորագրում չի սպասվում: Մինչդեռ որոշ թուրք վերլուծաբաններ չեն բացառում, որ Ռուսաստանի և Թուրքիայի նախագահներ Պուտինն ու Էրդողանը կարող են «պատմական գործարք» կնքել Սոչիում կայանալիք անձնական հանդիպման ժամանակ: