Հայկական պատվիրակությունը Սևծովյան տնտեսական համագործակցության կազմակերպության խորհրդարանական վեհաժողովում ներկայացրել է վերջին օրերին Արցախում տիրող պատերազմական իրավիճակը, ճեպազրույցի ժամանակ ասաց պատվիրակության ղեկավար, իմքայլական պատգամավոր Բաբկեն Թունյանը:
«ՍԾՏՄ-ն տնտեսական կազմակերպություն է, բայց ավելի շատ որպես քաղաքական հարթակ օգտագործելու փորձ է արվում: Նիստը շատ բուռն անցավ, փորձեցին արձագանքել մեր հայտարարությանը, բայց վերջում բոլորի համար պարզ դարձավ՝ ով է այդ իրադարձությունների պատասխանատուն և որն է այս ամենի իրական նպատակը: Մենք փորձեցինք հասցնել, որ հայկական կողմի դեմ գործում է ահաբեկչական ալյանս», – ասաց նա:
Հայկական պատվիրակության անդամ Վահե Էնֆիաջյանն իր հերթին հիշեցրեց, որ ՍՏԾՄ կառույցի գլխավոր քարտուղարն ադրբեջանցի է, և նա փորձել է արգելել հայկական պատվիրակության անդամ Անուշ Բեղլոյանին ընթերցել թուրք-ադրբեջանական ագրեսիայի մասին նախապես պատրաստած հայտարարությունը: