Ռուսաստանում դադարեցվել է հայկական արտադրության ավելի քան 70 հազար շիշ խմելու ջրի և գազավորված ըմպելիքների վաճառքը: Սահմանափակումները կիրառել է «Հեռանկարային տեխնոլոգիաների զարգացման կենտրոնը»՝ «Ռոսպոտրեբնադզորի» հանձնարարականով:
Նշվում է, որ որոշումն ընդունվել է «արտադրանքին ներկայացվող պահանջների խախտման պատճառով»:
«Ներկայումս «Ռոսպոտրեբնադզորի» նշած խմբաքանակների իրացումն արգելված է մանրածախ և առցանց վաճառքի համար՝ մինչև անհրաժեշտ ստուգումների ավարտը»,- մանրամասնել են կենտրոնից:
Ռուսաստանը մայիսի վերջից պարբերաբար սահմանափակումներ է կիրառում Հայաստանից մի շարք ապրանքատեսակների մատակարարումների նկատմամբ՝ ծաղիկներ, հանքային ջուր, ալկոհոլային արտադրանք, բանջարեղեն, միրգ, ձկնամթերք, կաթնամթերք և այլ ապրանքատեսակներ: Ռուսական կողմն այդ որոշումները բացատրում է բուսասանիտարական պահանջների խախտումներով: