Կառավարությունը Լոռու և Տավուշի մարզերում մայիսի 26-ին տեղի ունեցած ջրհեղեղի հետևանքով տրանսպորտային միջոցներին պատճառված վնասի համար փոխհատուցում կտրամադրի:
Համապատասխան որոշումը հաստատվել է կառավարության օգոստոսի 15-ի նիստում:
«Այս անգամ անդրադառնում ենք տրանսպորտային միջոցին պատճառված վնասի հատուցումներին: Այս պահի դրությամբ համայնքային հանձնաժողովներն արձանագրել են 193 տրանսպորտային միջոցներ, որոնք աղետի հետևանքով վնասվել են, կամ մեր քաղաքացիները կորուստ ունեն: Փոխհատուցման շահառուներն այն անձինք են, որոնց անունով գրանցված է տրանսպորտային միջոցը»,-ասաց Ներքին գործերի փոխնախարար Արփինե Սարգսյանը:
Նա վստահեցրեց, որ 193 տրանսպորտային միջոցներից յուրաքանչյուրը կունենա անհատական փորձագիտական եզրակացություն, որը հիմք կհանդիսանա մարզպետների համար՝ իրականացնելու փոխհատուցումը: 193 տրանսպորտային միջոցներից 152-ի մասով արդեն իսկ կան վերջնական փորձագիտական եզրակացությունները:
Ըստ Սարգսյանի՝ քաղաքացիները հնարավորություն կունենան դիմում ներկայացնելու օգոստոսի 26-ից և կարճ օրերի ընթացքում ստանալու հատուցում: Քաղաքացիները կներկայացնեն հաշվեհամար, որին անկանխիկ եղանակով փոխհատուցումը կիրականացվի:
«Որքան որ փորձագետը ֆիքսի որպես պատճառված վնաս, այնքան մենք ամբողջական հատուցումն իրականացնելու ենք»,-նշեց փոխնախարարը:
Վարչապետ Նիկոլ Փաշինյանը հարցրեց՝ հնարավորություն կլինի՞ նոր մեքենա ձեռք բերել, փոխնախարարը պատասխանեց, որ այդպիսի 3 դեպք կա այս պահի դրությամբ, կտրամադրվի տվյալ տրանսպորտային միջոցի համար առկա միջին շուկայական արժեքի չափով վնասի հատուցում: «Ես վստահեցնում եմ, որ մնացյալ դեպքերում փորձագետներն այնպես են հաշվարկներն իրականացրել, որ դա ավելի քան բավարար կլինի մեր քաղաքացիներին, որ վերանորոգեն և պատշաճ տեսքի բերեն տրանսպորտային միջոցները»,–վստահեցրեց Սարգսյանը: