Սկանդալի կենտրոնում հայտնված՝ Ջոն Կիրակոսյանի անվան դպրոցում Երևանի քաղաքապետ Տիգրան Ավինյանը տնօրենի նոր պաշտոնակատար է նշանակել Քրիստինե Դումանյանին:
Այս մասին լրագրողների հետ զրույցում տեղեկացրեց քաղաքապետարանի հանրակրթության վարչության պետ Մարգարիտ Խաչատրյանը։
«Քաղաքապետի որոշումն է։ Աշխատանքային գործընթաց էր, որևէ քննադատություն չի եղել։ Ընդունման-հանձնման նախնական փուլն է։ Դպրոցը չուներ տնօրենի պաշտոնակատար, պարտականությունների կատարումը վերապահված էր աշխատակիցներից մեկին՝ Լարիսա Մովսիսյանին, նա առողջական խնդիրների պատճառով չի կարողացել ներկայանալ աշխատանքի։ Անհրաժեշտություն է առաջացել նշանակել պաշտոնակատար»,- ասաց նա:
Հիշեցնենք՝ օրեր առաջ իրավապահները գործողություններ էին իրականացրել Ջոն Կիրակոսյանի անվան թիվ 20 դպրոցում: Հաստատության Ֆիզիկայի ուսուցիչ Արամ Ծատուրյանի նկատմամբ հանրային քրեական հետապնդում է հարուցվել անառակաբարո արարք կատարելու հոդվածով։ Ուսուցիչը կալանավորվել է։