Օզնի ջուր գետում ապրում է լեռնային կարմրախայտը, իսկ ափերին բուրում է անուշահոտ դաղձը։ Սամսար լեռնաշղթայի արեւելյան լանջի ստորոտին՝ ծովի մակերեւույթից 1570 մ բարձրության վրա է գտնվում Օզնի կամ Հինիա կոչվող բնակավայրը՝ հայաբնակ գյուղ, Վրաստանի Քվեմո Քարթլիի մարզի Ծալկայի շրջանում: Ջավախքին բնորոշ առանձնահատուկ բնությամբ, սառնորակ ջրով ու հողին ամուր կառչած մարդկանցով է հայտնի այս գյուղը: