«Վագներ»-ի հիմնադիր Եվգենի Պրիգոժինը ռազմական ապստամբության փորձ է կատարել իշխանությունների կողմից ֆինանսավորումը դադարեցնելու պատճառով։ Այս մասին հունիսի 29-ին հայտարարել է Պետդումայի պաշտպանության կոմիտեի նախագահ Անդրեյ Կարտապոլովը։
Նրա խոսքով՝ ապստամբության փորձից մի քանի օր առաջ ՌԴ ՊՆ-ն տեղեկացրել է, որ բոլոր մարտական կազմավորումները պետք է պայմանագիր կնքեն նախարարության հետ։
Նա պարզաբանել է, որ Պրիգոժինին տեղեկացրել են հրահանգները չկատարելու հետևանքների մասին՝ նրան զգուշացրել են այս դեպքում ֆինանսավորումը դադարեցնելու մասին։
Հունիսի 24-ին ՌԴ նախագահ Վլադիմիր Պուտինը, Վագների ՊՄԿ-ի ղեկավարության կողմից ապստամբության փորձի ֆոնին, դիմեց ռուսներին և խոստացավ անել ամեն ինչ երկիրը պաշտպանելու համար։ Բելառուսի առաջնորդ Լուկաշենկոն ռուս գործընկերոջ հետ համաձայնությամբ բանակցություններ է վարել ՊՄԿ-ի ղեկավարության հետ։ Կողմերը համաձայնության են եկել «Ռուսաստանի տարածքում արյունալի սպանդ» սանձազերծելու անթույլատրելիության շուրջ։
Ավելի ուշ՝ հունիսի 27-ին, Լուկաշենկոն հաստատել է, որ Պրիգոժինն արդեն ժամանել է հանրապետություն։ Նրան անվտանգության երաշխիքներ են տրվել։Այդ օրը Բելառուսի նախագահը նաեւ ասել էր, որ Պրիգոժինի հետ հեռախոսազրույցների ժամանակ զգուշացրել է, որ արյունահեղություն չպետք է թույլ տալ։ Լուկաշենկոն հաստատել է, որ ՊՄԿ «Վագների» ղեկավարից պահանջել է զոհեր չունենալ հատկապես խաղաղ բնակչության շրջանում։ Նրա խոսքով՝ Պրիգոժինը իրեն երդվել է, որ ՊՄԿ-ները խաղաղ բնակիչներին սպանելու նպատակ չունեն, և դա տեղի չի ունենա։ Ավելի ուշ կողմերը պայմանավորվել են դադարեցնել Վագների ավտոշարասյան շարժը դեպի Մոսկվա։
Հունիսի 29-ին Պեսկովն ասել է, որ Կրեմլը չգիտի, թե ներկայումս որտեղ է գտնվում Պրիգոժինը։