Երկուշաբթի Երևանում աշխատանքն է սկսել ռուս-հայկական միջտարածաշրջանային համաժողովը։ ՌԴ նախագահ Վլադիմիր Պուտինը ողջունել է համաժողովի մասնակիցներին՝ նշելով, որ Ռուսաստանը և Հայաստանը տարբեր ոլորտներում համագործակցության մեծ փորձ են կուտակել՝ գրում է РИА Новости-ն:
Ռուսաստանի Դաշնության ղեկավարը վստահություն է հայտնել, որ համաժողովի գաղափարներն ու առաջարկները գործնականում պահանջված կլինեն, կծառայեն երկու երկրի միջև գործընկերության ամրապնդմանը, եվրասիական տարածքում փոխշահավետ ինտեգրացիոն գործընթացներին:
Համաժողովի ծրագիրը ներառում է կլոր սեղանների անցկացում, որոնցում կքննարկվեն տարածաշրջանների լոգիստիկ և ներդրումային ներուժի զարգացման, թվայնացման, ինչպես նաև Ռուսաստանի և Հայաստանի միջև հումանիտար համագործակցության արդիական հարցերը:
Համաժողովի շրջանակներում նախատեսվում են ռուս և հայ ձեռներեցների հանդիպումներ։ Բանակցություններ կանցկացվեն պետական և բիզնես կառույցների ներկայացուցիչների միջև։
Ռուսական պատվիրակության կազմում ընդգրկված են ավելի քան 250 մասնակիցներ, կազմակերպությունների և գործարար շրջանակների ավելի քան 150 ներկայացուցիչներ, ինչպես նաև Դաշնության 13 սուբյեկտի, նախագահի աշխատակազմի, տնտեսական զարգացման, արտաքին գործերի, կրթության և գիտության նախարարությունների ներկայացուցիչներ: