Ռուսաստանի նախագահ Վլադիմիր Պուտինը մտադիր չէ դադարեցնել պատերազմն Ուկրաինայում, քանի դեռ Արևմուտքը չի սկսել Մոսկվայի հետ երկխոսությունը՝ խաղաղության նրա պայմաններով։ Այդ մասին հայտնել է Reuters-ը՝ հղում անելով Կրեմլին մոտ կանգնած երեք աղբյուրի։ Միևնույն ժամանակ, Ռուսաստանի ղեկավարը, ըստ աղբյուրի, հաշվի չի առնի ԱՄՆ նախագահ Դոնալդ Թրամփի հայտարարությունը Մոսկվայի դեմ պատժամիջոցները խստացնելու պատրաստակամության մասին։ Ավելին, ռուսական զորքերի առաջխաղացմանը զուգընթաց, Պուտինի տարածքային պահանջները կարող են ընդլայնվել։
Գործակալության աղբյուրների փոխանցմամբ՝ Վլադիմիր Պուտինը կարծում է, որ Ռուսաստանի տնտեսությունն ու զինված ուժերը բավականաչափ ուժեղ են՝ Արևմուտքի հետագա սահմանափակող միջոցառումներին դիմակայելու համար։ Նա կարծում է, որ Ռուսաստանը կարող է հաղթահարել հետագա տնտեսական դժվարությունները, այդ թվում՝ Վաշինգտոնի կողմից ռուսական նավթի գնորդների նկատմամբ մաքսատուրքերի հնարավոր սահմանումը, նշում է Reuters-ը։
Ռուսաստանի նախագահի մամուլի քարտուղար Դմիտրի Պեսկովն էլ, մեկնաբանելով Թրամփի հայտարարությունները, հայտնել է, որ դրանք «շատ լուրջ» են։ Պեսկովի խոսքով՝ Ռուսաստանի նախագահը կմեկնաբանի իր ամերիկացի գործընկերոջ հայտարարությունները, «եթե կամ երբ այն անհրաժեշտ համարի»։