Ոմանք փորձել են տպավորություն ստեղծել և Սյունիքը հակադրել մնացած Հայաստանին, թե իբր Սյունիքում մարդիկ այլ տրամադրություն ունեն, բայց այսօր դուք միասնական կերպով ցույց տվեցիք և կոտրեցիք բոլոր այն ձեռքերը, որոնք փորձում են Հայաստանը հակադրել Հայաստանին: Այս մասին Կապանում՝ քաղաքացիների հետ հանդիպմանը, ասաց ՀՀ վարչապետի պաշտոնակատար, «Քաղաքացիական պայմանագիր» կուսակցության նախընտրական ցուցակը գլխավորող Նիկոլ Փաշինյանը:
«Չեք կարողացել և չեք կարողանալու Հայաստանը հակադրել Հայաստանին»,- նշեց Փաշինյանը՝ ընդգծելով, որ դավադիր ուժերը տեղ չեն ունենալու Հայաստանի Հանրապետությունում:
Փաշինյանի խոսքով՝ իրեն տեղեկացրել են, որ Զանգեզուրի պղնձամոլիբդենային կոմբինատի ղեկավարությունը զգուշացրել է աշխատակիցներին, որ Նիկոլ Փաշինյանի հետ հանդիպման գնացողները աշխատանքից կազատվեն: Նիկոլ Փաշինյանը նշեց՝ այդ մասին հայտարարածները մինչև հուլիսի 15-ը չեն աշխատի կոմբինատում:
«Ես ձեզ դա խոստանում են: Բոլոր նրանք, ում կսպառնան, որ աշխատանքից ազատելու են, ոչ միայն վերականգնվելու են աշխատանքի, այլև նրանց ամբողջական աշխատավարձը վճարվելու է այդ դուրս վռնդվածների հաշվին»,- ասաց վարչապետի պաշտոնակատարը: