Ուզում ենք, որ ԼՂ-ից բոլոր բռնի տեղահանվածները մնան, ապրեն, աշխատեն ՀՀ-ում. Փաշինյան

Այն դեպքում, երբ ԼՂ-ի մեր քույրերն ու եղբայրները իրենց տներ վերադառնալու հնարավորություն չեն ունենա որևէ պատճառով, մեր քաղաքականությունն է ամեն ինչ անել, որ բոլոր բռնի տեղահանվածները մնան ՀՀ-ում: Այդ մասին Կառավարության՝ հոկտեմբերի 12-ի նիստին ասաց ՀՀ վարչապետ Նիկոլ Փաշինյանը:

«Մենք ուզում ենք, որ բոլորը՝ առանց բացառության, մնան, ապրեն, աշխատեն ՀՀ-ում: Եվ մեր քաղաքականությունն այս է լինելու»,- ասաց նա:

Փաշինյանը նաև տեղեկացրեց, որ ամեն օր ստանում է թվեր, թե ԼՂ-ից բռնի տեղահանված քանի մարդ է դուրս եկել ՀՀ-ից, և որ այս պահի դրությամբ նրանց թիվը 2500 է:

«Հույս ունեմ, որ նրանք պարզապես այս շոկային վիճակը հաղթահարելու համար այցելում են արտերկրում ապրող իրենց բարեկամներին, հարազատներին, ինչ-որ ժամանակ անցկացնեն այնտեղ և վերադառնան»,- ասաց նա:

Վարչապետը տեղեկացրեց, որ այժմ ժողովրդագրական, բնակարանների ապահովման, սահմանամերձ գյուղերում տներ կառուցելու հետ կապված ծրագրեր են մշակվում, և որ ամեն ինչ արվելու է, որ ԼՂ-ից բռնի տեղահանվածների՝ ՀՀ-ում մնալու հնարավորությունները չսահմանափակվեն:

«ՀՀ-ն չէր ուզում, որ ԼՂ ժողովուրդը ստիպված լինի լքել իրենց տները, բայց եթե դա տեղի է ունեցել,- ինչու, ինչպես՝ դրա մասին խոսել ենք, և ենթադրում եմ՝ խոսելու առիթներ կլինի,- մենք գործով ապացուցեցինք, որ նույնպիսի գորովանքով ենք վերաբերվում ԼՂ-ի մեր քույրերի և եղբայրների կարիքներին, ինչպես ՀՀ քաղաքացիների պարագայում»,- ասաց նա:

Related posts

ՔՊ վարչության նիստում քննարկվել են կուսակցական, քաղաքական և հանրային կարևորություն ունեցող հարցեր

Սահմանազատման գործընթացի վերաբերյալ բոլոր հարցերը քննարկվում են բացառապես պետական հանձնաժողովների համատեղ աշխատանքների շրջանակներում․ Մհեր Գրիգորյանի գրասենյակ

Աննա Հակոբյանը բարձրագույն կրթությունը կշարունակի Չինաստանում, Մարինե Հակոբյանը կսովորի Խաչատուր Աբովյանի անվան մանկավարժական համալսարանում