ՀՀ ԱԺ «Քաղաքացիական պայմանագիր» խմբակցության պատգամավոր, ՔՊ վարչության փոխնախագահ Վահագն Ալեքսանյանը «Ֆեյսբուք»-ի իր էջում անդրադարձել է ՀՀ արտաքին գործերի նախկին նախարար Վարդան Օսկանյանի հայտարարություններին:
«Վարդան Օսկանյանը ամերիկահայերին կոչ է արել չհանդիպել վարչապետ Նիկոլ Փաշինյանի հետ։
Սա, ի դեպ, նույն Վարդան Օսկանյանն է, որը 2000թ-ի ապրիլի 25-ին Գլենդելում հայ համայնքի հետ հանդիպման ընթացքում իր բնորոշմամբ «շատ մասնավոր, ոչ պաշտոնական» ելույթի ժամանակ հայտարարել էր հետևյալը. «Մեղրին տրվում է Ադրբեջանին, Լաչինը Ղարաբաղի հետ տրվում է Հայաստանին։ Մեղրիով Հայաստանին տրվում է մի սուվերեն ճանապարհ, որով Հայաստանը կարող է սուվերեն հաղորդակցության մեջ մտնել Իրանի հետ»։ Ելույթը հրապարակվել էր The California Courier շաբաթաթերթում, որը նաև մեջբերել էր Օսկանյանի այն խոսքերը, որ վերը նշված առաջարկի մեջ «ինչ-որ տրամաբանություն կա» և «պետք է դրվի լուրջ քննարկման»»,- գրել է Ալեքսյանը։
Նշենք՝ Օսկանյանը ավելի վաղ դիմել է ամերիկահայ համայնքի և կազմակերպությունների ներկայացուցիչներին, որոնք փետրվարի 3-ին Հայաստանի դեսպանատանը հրավիրված են վարչապետ Նիկոլ Փաշինյանի հետ հանդիպման:
Օսկանյանը կոչ է արել չմասնակցել այդ հանդիպմանը: