Հաշվի առնելով Երևանում ունեցած քննարկումները՝ Հայաստան-ՆԱՏՕ հարաբերություններում ինչ նոր հեռանկարներ է տեսնում ՆԱՏՕ-ի գլխավոր քարտուղար Ենս Ստոլտենբերգը: Հանրային հեռուստաընկերությանը տված հարցազրույցում, անդրադառնալով այս հարցին, Ստոլտենբերգը պատասխանել է.
«Կարծում եմ՝ հսկայական ներուժ կա միասին ավելին անելու հարցում: Այժմ մոտ ենք նոր գործընկերային ծրագրի համաձայնեցմանը: Այն նոր հիմք կստեղծի՝ հասկանալու, թե ինչպես կարող ենք ավելի սերտ համագործակցել, ինչպես ՆԱՏՕ-ն կարող է աջակցել Հայաստանին պաշտպանական և անվտանգային քաղաքականությունը զարգացնելու հարցում, օգնել ոչ միայն կառուցների բարեփոխման հարցում, այլև հետագայում աշխատել կիբեռանվտանգության, ականազերծման հարցերի ուղղությամբ: Իհարկե, մենք պատրաստ ենք անել այնքան, որքան Հայաստանն է պատրաստ:
Ինչպես նշեցի, ՆԱՏՕ-ն որևէ երկրի երբեք չի ստիպել գործել իր կամքին հակառակ: Մենք պատրաստ ենք աշխատել Հայաստանի հետ, քանի որ այն մեզ համար կարևոր գործընկեր է:
Ողջունում ենք նաև երկրի ղեկավարության ամուր հանձնառությունը ժողովրդավարությանը, օրենքի գերակայությանը՝ հենց այն արժեքներին, որոնք կարևորում է ՆԱՏՕ-ն»,- ասել է նա: