Միրզոյան-Լավրով հանդիպմանը զուգահեռ այսօր արտգործնախարարության շենքի առջև բողոքի ակցիա են անցկացրել մի խումբ քաղաքացիներ՝ հայտարարելով, որ իրենց բողոքն են արտահայտում Հայաստանի նկատմամբ Ռուսաստանի վարած քաղաքականության դեմ:
Նրանց թվում են եղել «Հանուն Հանրապետություն» կուսակցության ղեկավար Արման Բաբաջանյանը, Եվրոպական կուսակցության նախագահ Տիգրան Խզմալյանը, իրավապաշտպան Արթուր Սաքունցը, «Իրավունքի Եվրոպա» հասարակական կազմակերպության նախագահ, փաստաբան Լուսինե Հակոբյանը և ուրիշներ:
Ակցիայի մասնակիցները Վլադիմիր Պուտինի ու Սերգեյ Լավրովի նկարներով ու «Մարդասպաններ» գրությամբ պաստառներ են պարզել և Հայաստանից հեռանալու կոչեր հնչեցրել: Իրավիճակը լարվել է, երբ ոստիկանները խնդրել են հեռանալ շենքի մոտից: Ակցիայի մասնակիցները հրաժարվել են, ինչից հետո ոստիկանները հրմշտելով հեռացրել են նրանց դեպի Շահումյանի արձանի մոտ: