Մարսելում ծնված ու մեծացած Ալեքսանդրա Օհանյանը հինգ տարի առաջ եկավ Երևանի Կոմիտասի անվան պետական կոնսերվատորիայի Գյումրու մասնաճյուղ՝ սովորելու հայկական երաժշտություն, մասնագիտանալու քանոնի մեջ ու ավելի մոտիկից ճանաչելու իր արմատների մշակույթը։ Ավարտելով ուսումնառության 5 տարին ու վերադառնալով Ֆրանսիա՝ իր հետ տանում է ոչ միայն դիպլոմն ու մասնագիտական գիտելիքը, այլև մի գործիք, որի հնչյուններով պատրաստվում է հայկական մշակույթը հասցնել նոր լսարանների։