Հռոմի քաղաքային իշխանությունները երկու եվրո վճար են սահմանել Տրևի շատրվանին մոտենալու համար՝ այցելուների հոսքը զսպելու և տեղական թանգարաններին աջակցելու համար: Մուտքը տոմսերով է՝ ժամանակի նշումով։
Միջոցառումն այն զբոսաշրջիկների համար է, որոնք երազում են առանց խոչընդոտների լուսանկարվել բարոկկո գլուխգործոցի ֆոնին, որը հայտնի է «Քաղցր կյանք» ֆիլմով: Առաջին արդյունքները հուսադրող են, մարդիկ պակասել են, այցելուները լուսանկարվում են արևի տակ, առանց հրմշտոցի։ Ակնկալվում է, որ նախաձեռնությունը տարեկան մի քանի միլիոն եվրո կբերի:
Միջոցները կօգտագործվեն նաև տեղի բնակիչների համար 12 թանգարաններ և հնագիտական վայրեր անվճար մուտք ապահովելու համար, տոմս չունեցող այցելուներն էլ շատրվանը կկարողանան տեսնել հեռվից:
Տրևի շատրվանը տարեկան գրավում է մոտ 10 միլիոն այցելուի և զգալի գումարներ է ապահովում մետաղադրամներ նետելու վաղեմի ավանդույթի շնորհիվ: Բոլոր եկամուտները փոխանցվում են «Կարիտաս» կաթոլիկ բարեգործական կազմակերպության Հռոմի մասնաճյուղին: