Հայաստանի կառավարությունը, նախատեսվում է, որ այս տարվա ընթացքում կավարտի Զինված ուժերի բարեփոխումների հայեցակարգը: «Արմենպրես»-ի հաղորդմամբ՝ այս մասին ասել է Հայաստանի վարչապետ Նիկոլ Փաշինյանը Հայաստանի Հանրային ռադիոյի «Անվտանգային միջավայր» հաղորդմանը տված հարցազրույցում:
Անդրադառնալով հարցին, թե ինչո՞վ է պայմանավորված Հայաստանի Զինված ուժերի ռեֆորմների հայեցակարգի բացակայությունը՝ հաշվի առնելով, որ դեռ 2022թ. հունվարին պետք է պատրաստ լիներ «Պաշտպանության մասին օրենք»-ի նոր նախագիծը՝ վարչապետն ասել է. «2022 թ.-ի հունվարին այդ հայեցակարգը պատրաստ էր, բայց 2022 թ.-ի ձմռանը տեղի ունեցան իրադարձություններ, որոնք ակնհայտ դարձրին, որ այդ հայեցակարգով չենք կարող առաջ գնալ: Եվ մենք հիմա պետք է ոչ միայն ունենանք հայեցակարգ, այլ պետք է հասկանալ նաև, թե այդ հայեցակարգի իրագործումը որքանով է իրատեսական, այդ թվում՝ ռազմատեխնիկական ոլորտում համագործակցության վերաբերյալ։ Մենք պետք է հասկանանք, թե ում հետ իրատեսորեն կարող ենք ունենալ ռազմատեխնիկական և պաշտպանական բնույթի հարաբերություններ»:
Նա հավելել է՝ այդ խնդիրը նախկինում հեշտ է եղել, որովհետև այդ հարցը չի եղել և հայեցակարգ ստեղծելու մեջ էլ բարդություն չի եղել։
«Նախկինում մեր պաշտպանական ոլորտի հարաբերությունների 95-97 տոկոսը Ռուսաստանի Դաշնության հետ էր, հիմա այդպես չի կարող լինել՝ և օբյեկտիվ, և սուբյեկտիվ պատճառներով։ Հիմա պետք է հասկանանք այս հայեցակարգի մեջ ի՞նչ հարաբերություններ ենք ունենում, օրինակ, Հնդկաստանի հետ»,-նշել է նա:
Վարչապետը կարևորել է նաև պատասխանելը հարցերին, թե Հայաստանը Իրանի Իսլամական Հանրապետության, Վրաստանի, ԱՄՆ-ի հետ ի՞նչ անվտանգային հարաբերություններ է ունենալու, ունենալո՞ւ է, թե՞ չի ունենալու, Վրաստանի հետ ի՞նչ անվտանգային հարաբերություններ է ունենալու, ունենալո՞ւ է, թե՞ չի ունենալու, կամ Ռուսաստանի հետ անվտանգային հարաբերությունները փոխվելո՞ւ են, թե՞ չեն փոխվելու, ինչպե՞ս են փոխվելու, Հայաստանը մնո՞ւմ է ՀԱՊԿ-ի անդամ, թե՞ չի մնում, Ֆրանսիայի հետ ի՞նչ հարաբերություններ է կառուցում։
«Այստեղ խնդիրը հետևյալն է, որ այդ հայեցակարգը որպես դեկլարացիա արդեն հռչակված է: Եվ մենք պետք է ձևակերպենք այնպիսի հայեցակարգ, որի իրագործման շուրջ առնվազն ունենք պայմանավորվածություններ: Եվ ես կարծում եմ, որ մենք այս տարվա ընթացքում պետք է այդ հայեցակարգն ավարտենք։ Այստեղ կոնցեպտուալ մոտեցում կա, ինքը տեսակա՞ն փաստաթուղթ է, որը պետք է ընդունենք և դրա իրագործման ձևերը հասկանանք, թե՞ ինքն, այնուամենայնիվ, 50-50՝ և տեսական, և գործնական է, որի տեսությունը կա և որի պրակտիկայի պայմանավորվածությունները որոշակի փաստաթղթերով, պայմանագրերով արդեն ամրացված են»,-ասել է վարչապետը:
Փաշինյանն ընդգծել է՝ կառավարությունն ասել է և գնում է դեպի պրոֆեսիոնալ բանակ: Փաշինյանը «Պաշտպան հայրենյաց» ծրագիրը համարեց հոյակապ բարեփոխում՝ բայց նաև կարևորելով, որ այդ հայեցակարգն ունենա քաղաքական կոնտեքստ։